सिभिल फलोअपः एक हजारबढी युवासंग करोडौ ठगेर फरार ‘सि-स्टार’का सञ्चालक लामा पक्राउ

काठमाडौँ । एक हजार जना भन्दा बढी युवाहरुबाट करौडौ रुपैया ठगी गरी फरार रहेका लाल बहादुर लामा पक्राउ परेका छन् । काठमाडौँको बाँसबारीमा ‘सि स्टार सिपिङ सर्भिस एण्ड ट्रेनिङ सेन्टर’ खोलेर युवाहरुसंग करोडौ ठगी गर्ने लामा सोमबार शंखमुल पार्कबाट पक्राउ परेका हुन् ।

उनलाई साेमबार दिउँसाे करिब ४ बजे उपत्यका अपराध अनुसन्धान कार्यालयको टोलीले पक्राउ गरेको डिएसपी गोविन्द पन्थीले सिभिलखबरलाई बताए ।

ललितपुरको कोन्जोसोम गाउँपालिका वडा नम्बर १ घर भएका लामा सो सेन्टरका सञ्चालक हुन् । उनि एक बर्षदेखि फरार थिए ।

सि स्टार सिपिङ सर्भिस एण्ड ट्रेनिङ सेन्टरले स्थापना भएको ९ महिना बित्न नपाउँदै एक हजारबढी युवाहरुसंग करोडौ रकम ठगी गरेको खुलेपछि प्रहरीको रोहवरमा वैदेशिक रोजगार विभागले सि स्टारमा २०७९ पुस २२ गते छापा मारेको थियो ।

सो समय विभागबाट खटिएका कर्मचारीले उक्त ट्रेनिङ सेन्टरबाट ९ सय ९७ थान राहदानी समेत बरामद गरेको थियो । ठगिएका युवाहरुको उजुरीपछि विभागकाे टाेली सि स्टारमा छापा मार्न पुगेकाे थियाे ।

कोरिया, मकाउ, लिथोनिया, दुबई, मलेसियालगायतका देशमा रोजगारीका लागि पठाउने भन्दै सञ्चालक लामा समुहले एक हजार जना भन्दाबढी युवाहरुबाट जनही १ लाखदेखि १४ लाखसम्म उठाएर फरार भएका थिए । वैदेशिक रोजगार विभागका अनुसार उक्त ट्रनिङ सेन्टरको विरुद्ध एक हजारभन्दा बढी लिखित तथा मौखिक उजुरी परेका छन् ।

उजुरीका आधारमा लामा समुहले ५० कराेडकाे हाराहारीमा ठगी गरेकाे अनुमान प्रहरीकाे छ । ठगीमा संलग्न लामा समुहका अन्य भने अहिलेसम्म पक्राउ पर्न सकेका छैनन् । उनिहरुको समेत खाेजी भइरहेकाे प्रहरीले जनाएकाे छ ।

पक्राउ परेका लामालाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको प्रहरीले जनाएको छ ।

यस ठगीका बिषयमा सिभिलखबरमा यसअघि प्रकाशित समाचारहरु:

• ‘सि-स्टार’का सञ्चालक लामा र सिइओ न्यौपानेको जालमा फसे हजार युवा, ५० करोड ठगेर फरार

• ‘सि–स्टार’को ठगी: अनुसन्धान प्रगति शुन्य, पीडितबाटै सुराकको अपेक्षा गर्ने रोजगार विभागमाथि नै आशङ्का

• अनुसन्धान अघि बढ्न नसकेको ‘सि–स्टार’को करोडौँ ठगी काण्डप्रति श्रम मन्त्रालयको गम्भिर चासो, विभागसँग सोधपुछ गर्दै मन्त्रालय