ताप्ले र अश्राङको स्वास्थ्यकेन्द्रमा ‘ल्याब’ बनाउन प्रेम खत्रीले दिए ८० लाखको उपकरण, आरुघाटमा सहकारी भवन

गोरखा । सम्भव नेपालका संस्थापक अध्यक्ष प्रेमकुमार खत्रीको पहलमा गोरखाका दुई पालिकाका स्वास्थ्य केन्द्रले सुविधासम्पन्न प्रयोगशाला स्थापनाका लागि आवस्यक सामाग्री प्राप्त गरेका छन् । समाजसेवी समेत रहेका युवा नेता खत्रीको पहलमा गोरखा नगरपालिका २ को कोखेआहाले शहरी स्वास्थ्य केन्द्र र भिमसेन थापा गाउँपालिका ६ अश्राङ स्थित शहिदस्मृति आधारभूत अस्पतालमा सुविधासम्पन्न प्रयोगशालाका लागि अत्याधुकि सामाग्री प्रदान गरिएको हो ।

नागरिकलाई गाउँघरमै गुणस्तरीय स्वास्थ्य सेवा उपलब्ध गराउने उद्देश्यले दुई पालिकाका स्वास्थ्य केन्द्रमा गरी करिब ८० लाख रुपैयाँ बराबरका आधुनिक स्वास्थ्य उपकरणहरू हस्तान्तरण गरिएको सम्भव नेपालका कार्यक्रम ब्यवस्थापक उत्तम अधिकारीले बताए।

अश्राङस्थित शहिदस्मृति आधारभूत अस्पताललाई अत्याधुनिक डिजिटल प्रविधिको एक्स–रे (डीआर सिस्टम), भिडिओ एक्स–रे मेसिन, ईसीजी मेसिन, फ्रिज लगायतका सामग्रीहरू प्रदान गरिएको छ। यसैगरी, गोरखा नगरपालिका–२, ताप्लेस्थित कोखेआहाले शहरी स्वास्थ्य केन्द्रमा व्यवस्थित प्रयोगशाला (ल्याब) स्थापनाका लागि आइएलआर मेसिन, यूएसजी मेसिन, इलेक्ट्रिक एनालाइजर र माइक्रोस्कोप लगायतका उपकरणहरू उपलब्ध गराइएको छ।

यी उपकरणसँगै अब त्यस क्षेत्रका बासिन्दाले सामान्य स्वास्थ्य परीक्षण र रिपोर्टका लागि सदरमुकाम वा चितवन–काठमाडौं धाउनुपर्ने बाध्यता हट्ने विश्वास लिइएको छ।

बुधबार एक कार्यक्रममावीच सम्भव नेपालका खत्रीले सो सामाग्री स्थानीय तह र स्वास्थ्य चौकीलाई हस्तान्तरण गरेका छन् । जसमा कोखेआहालेको कार्यक्रममा गोरखा नगरपालिका मेयर कृष्णबहादुर राना, उपमेयर सपना पुन, वडाध्यक्ष रहमतुल्ला मियाँ लगायतको सहभागिता रहेको थियो । त्यस्तै अश्राङमा भिमसेनथापा गाउँपालिकाका अध्यक्ष लोकप्रसाद वञ्जारा, उपाध्यक्ष अमृता वस्ती लगायतको उपस्थिती रहेको बताइएको छ ।

प्रयोगशाला स्थापनाका लागि सम्भव नेपालबाट प्राप्त आधुनिक र सुविधासम्पन्न उपकरण, औचारहरुको सदुपयोग गरि छिट्टै सेवा सञ्चालन गरिने पालिका प्रमुखहरुले प्रतिवद्धता जनाएका छन् । साथै कार्यक्रममा उनिहरुले सम्भव नेपाललाई धन्यवाद दिदै आगामी दिनमा समेत सहकार्यलाई प्रभावकारी बनाउने प्रतिवद्धता जनाएका छन् ।

त्यस्तै आरुघाट गाउँपालिका–८ मा स्थानीय महिलाहरूको सक्रियता र आर्थिक आत्मनिर्भरतालाई टेवा पुऱ्याउन नवनिर्मित सहकारी भवन समेत हस्तान्तरण गरिएको छ। साविकको बालकन्या महिला सहकारीसहितको मर्जरबाट बनेको सितला बचत तथा ऋण सहकारी संस्थाका लागि निर्माण गरिएको तीन कोठे सुविधासम्पन्न भवन, शौचालय र आवश्यक फर्निचर आजै एक समारोहका बीच प्रेमकुमार खत्रीले समुदायलाई हस्तान्तरण गरेका हुन् ।

आफ्नो गृहजिल्लाका नागरिकको सेवामा समर्पित हुन पाउनु नै सबैभन्दा ठूलो सन्तुष्टि रहेको बताउँदै खत्रीले यी सामग्री र पूर्वाधारले स्थानीयको जीवनस्तरमा प्रत्यक्ष सकारात्मक प्रभाव पार्ने विश्वास समेत ब्यक्त गरेका छन्। नागरिकको स्वास्थ्य र समृद्धिका लागि आफ्नो यो सेवामुखी अभियान आगामी दिनमा पनि अझ सशक्त रूपमा अगाडि बढ्ने उनले प्रतिबद्धता जनाए। आफ्नै घरदैलोमा अत्याधुनिक स्वास्थ्य सेवा र सहकारीको आफ्नै भवन पाएपछि स्थानीय बासिन्दा समेत खुसी भएका छन् ।

खत्रीकै पहलमा यसअघि गोरखाका ११ स्थानीय तहले १३ वटा एम्बुलेन्स प्राप्त गरेका थिए भने आरुघाट आधाभूत अस्पतालमा झण्डै डेढ करोड लगानीमा अत्याधुनिक प्रयोगशाला स्थापना भई सञ्चालन रहेको बताइएको छ ।