काेराेना जाेखिम बढ्याे : जेष्ठ नागरिक र बालबालिकालाई घरबाहिर ननिस्कन आग्रह

स्वास्थ्य तथा जनसंख्या मन्त्रालयले कोरोनाको महामारी तीव्र रुपमा फैलिँदै गएको भन्दै जेष्ठ नागरिक र बालबालिकालाई घर बाहिर ननिस्कन आग्रह गरेको छ।

आइतबार स्वास्थ्य मन्त्रालयको नियमित प्रेस ब्रिफिङमा मन्त्रालयका प्रवक्ता प्राडा. जागेश्वर गौतमले कोरोनाको महामारी तीव्र बनेको भन्दै ६० वर्षमाथिका वृद्ध र १२ वर्षमुनिका बालबालिकालाई घर बाहिर ननिस्कन आग्रह गरेको हो।

‘६० वर्षमाथिका जेष्ठ नागरिक र १२ वर्षमुनिका बालबालिका काठमाडौँ र यस्तै घनावस्ती भएका ठाउँमा घरबाहिर ननिस्कनुहुन अनुरोध छ’, प्रवक्ता गौतमले भने।

उनले कोरोनाबाट बच्न आफ्ना बानीमा सुधार गर्नुपर्ने बताए। नाक र मुख छोप्नेगरी माक्स लगाउने, मस्कलाई डोरीमा समाएर लगाउने र झिक्ने, कपडाको माक्स हरेक दिन धाएपछि मात्र प्रयोग गर्ने, अल्कोहल भएको स्यानिटाइजर प्रयोग गर्न, दूरी कायम गरेर बस्ने, जथाभावी नथुक्ने गरेमा कोरोनाबाट बँच्न सकिने उनको भनाइ छ।