सोमबार रातिदेखि ४ दिन ठूलो वर्षाको सम्भावना, सतर्कता अपनाउन आग्रह

भोलि अर्थात् सोमबार रातिदेखि कम्तीमा चार दिन फेरि ठूलो वर्षा हुने सम्भावना रहेको मौसम पूर्वानुमान महाशाखाले जनाएको छ।

महाशाखाका अनुसार सोमबार रातिदेखि न्यून चापीय रेखा नेपाल नजिकै रहने तथा अरब सागबारट जलवाष्पयुक्त हावा पनि प्रशस्त्र मात्रामा भित्रिने भएकाले देशका धेरैजसो स्थानमा झरी पर्ने तथा केही स्थानमा भारी वर्षा हुने सम्भावना देखिएको हो।

अघिल्लो हप्ता पनि देशभर लगातार झरी तथा भारी वर्षाका कारण ठूलो मात्रामा जनधनको क्षति भएको थियो। तर न्यून चापीय रेखा नेपालबाट केही टाढा दक्षिण सरेपछि केही दिनयता वर्षा केही कम भएको थियो।

तर सोमबार रातिदेखि त्याे रेखा पुनः नेपाल नजिक रहने भएकाले वर्षा बढ्ने सम्भावना देखिएको मौसमविद् गंगा नगरकोटीले बताइन्।

अझ यसपटक अरब सागरबाट जलवाष्पयुक्त हावासमेत प्रशस्त मात्रामा भित्रिने भएकाले वर्षा निकै हुने अनुमान गर्न सकिन्छ।