घाँसीकुवाको पहिरो हटाउन नसक्दा २४ घण्टादेखि अवरुद्ध छ पोखरा जाने बाटो

तनहुँ । अविरल वर्षाका कारण काठमाडौं-पोखरा सडकखण्ड २४ घण्टादेखि अवरुद्ध बनेको छ । तनहुँ घाँसीकुवामा हिजो बुधबार साँझ खसेको पहिरो आजसम्म हटाउन नसक्दा सडक अवरुद्ध बनेको हो ।

सडकको पहिरो बिहीबार बिहानैबाट हटाउन सुरु गरिएको थियो । तर सडकमा ठूला रुखसहित पहिरोले खसेकाले पहिरो हटाउन समय लागेको जिल्ला प्रहरी कार्यालय तनहुँले जनाएको छ । पहिरोले सडकको करिब डेढ सय मिटर भाग ढाकेको छ ।

मुख्य राजमार्ग अवरुद्ध भएपछि साना तथा ठूला सवारी साधनहरुलाई अलग-अलग वैकल्पिक बाटो प्रयोग गर्न भनिएको छ ।

तर वैकल्पिक बाटोसमेत साँघुरो र हिलाम्मे हुँदा साना तथा ठूला सबै सवारीसाधन लामो समयदेखि जाममा बस्न बाध्य छन् । बिहानैदेखि सवारी जाममा परेपछि यात्रुसमेत समस्यामा परेका छन् ।