भूकम्प पीडितकाे तथ्यांक संकलनमा लापरवाही, मृत्यु हुनेको संख्या घट्यो !

काठमाडौँ । जाजरकोट भूकम्पमा पीडित बनेकाकाे तथ्या‌ंक संकलनमा सरकारी निकायको लापरवाही देखिएकाे छ । भूकम्प प्रभावित पालिकाहरुवीच समन्वय नहुँदा पालिकाहरुले दाेहाेराे तथ्यांक संकलन गरेपछि क्षति समेत दाेहाेराे देखिएकाे पाइएकाे हाे । जसका कारण भूकम्पमा परि ज्यान गुमाएकाकाे संख्या समेत बढेकाे देखिएकाे छ ।

तर अहिले भूकम्पबाट मृत्यु हुनेहरूको संख्या घटेको छ । जाजरकाेट जिल्लामा यसअघि १०५ जनाको मृत्यु भएको भनिए पनि मृतक संख्या १०१ जना यकिन भएको छ । नलगाड नगरपालिकामा घर भएर भेरी नगरपालिका स्थित खलंगा बजारमा मृत्यु भएकाहरूको नाम दोहोरो परेको हुनाले संख्या कम भएको जिल्ला प्रहरी कार्यालय जाजरकोटले जनाएको छ ।

नलगाड नगरपालिकाकी उपमेयर सरिता सिंहको मृत्यु खलङ्गामा भएपनि नलगाड नगरपालिकाले पनि मृतकको सूचीमा उनको नाम राखेको पाइएको छ ।  चार जना मृतकको नाम दोहोरिएको जिल्ला प्रहरी कार्यालय जाजरकोटका डिएसपी सन्तोष रोकाले बताए ।

सरकारले यसअघि सार्वजनिक गरेको भूकम्पीडितको तथ्यांक हेरफेर गरेको हाे। जाजरकाेट र रुकुम पश्चिममा गरी मृतक संख्या १५३ रहेको सरकारको पछिल्लो विवरणमा उल्लेख छ।

यसअघि मृतक संख्या १५७ भनिएकोमा केही नाम दोहोरो परेकाले सच्याइएको सरकारको प्रष्टीकरण छ।