काेराेनाबाट मृत्यु हुनेकाे संख्या ४ लाख नजिक, ६७ लाखमा संक्रमण पुष्टि

संसारभर अहिलेसम्म ३ लाख ९२ हजार १ सय २५ जनाले भने काेराेना संक्रमणको कारण ज्यान गुमाएका छन्।

त्यस्तै विश्वभरका अहिलेसम्म ६६ लाख ८९ हजार ६२ जनामा कोरोना संक्रमण पुष्टि भएको छ। त्यसमध्ये अहिले ३० लाख ६८ हजार २ सय ७३ जना उपचारको क्रममा छन्।

संक्रमण भएका विश्वभरका ३२ लाख भन्दा धेरैले कारोना भाइरसलाई जितेका छन्। वर्ल्डओमिटरका अनुसार शुक्रबार बिहान ६ बजेसम्म विश्वभर गरेर ३२ लाख २८ हजार ६ सय ६६ जना संक्रमित उपचारपछि निको भएका छन्।

गएको २४ घण्टामा विश्वभर गरेर ५ हजार ३ सय ३८ जनाले संक्रमणको कारण ज्यान गुमाएका छन्। यस अवधिमा सबैभन्दा धेरै ब्राजिलमा १ हजार ३ सय ३७ जनाले ज्यान गुमाएका छन्।

मेक्सिकोमा १ हजार ९२ जनाले ज्यान गुमाएका छन् भने अमेरिकामा १ हजार ३१ जनाको मृत्यु भएको छ।

बिहीबार भारतमा २ सय ७५ जनाले ज्यान गुमाएका छन्। भारतमा अहिलेसम्म संक्रमणबाट ६ हजार ३ सय ६३ जनाको मृत्यु भएको छ। भारतमा हालसम्म २ लाख २६ हजार ७ सय १३ जनामा संक्रमण पुष्टि भएको छ।