श्रम बैंक सञ्चालन गर्दै काठमाडौँ महानगर, आबद्ध हुन योग्यता के ?

काठमाडौँ । काठमाण्डौ महानगरले श्रम बैङ्कमार्फत बेरोजगार नागरिकलाई रोजगारसँग जोड्ने भएको छ । महानगरले सूचना जारी गर्दै श्रम बैङ्कमा आबद्ध हुन नगर क्षेत्रभित्रका बेरोजगार नागरिकलाई आग्रह गरेको छ ।

सामाजिक विकास, पूर्वाधार निर्माण, मर्मत सम्भार, सम्पदा संरक्षण, वातावरण संरक्षण, सहरी सुव्यवस्था कायम गराउने सम्बन्धमा महानगरपालिकालाई आवश्यक पर्ने श्रम शक्तिको आपूर्तिलाई निरन्तरता दिन श्रम बैंक सञ्चालन गर्न लागिएको महानगरले जनाएको छ ।

सूचीकृत जनशक्तिलाई अन्य सरकारी, गैरसरकारी तथा निजी क्षेत्रमा समेत उपलब्ध गराउन सम्बन्ध सेतु बनाउनु श्रम बैङ्कको मुख्य उद्देश्य रहेको महानगरको भनाइ छ । महानगरपालिकाले चालु आर्थिक वर्ष २०८०/८१ को वार्षिक नीति तथा कार्यक्रममा महानगर स्वर्णिम योजना अन्तर्गत श्रम बैंक योजना सञ्चालन गर्ने नीति लिएको छ ।

उक्त परियोजनमार्फत बेरोजगार युवाहरूको विवरण संकलन गर्ने, उनीहरूलाई शून्य रोजगार गौरवको आयोजनामार्फत आवश्यक प्रशिक्षण दिने, रोजगारदाताको आवश्यकताअनुसार श्रममा पठाउनेलगायत काम गर्ने उल्लेख छ।

आबद्ध हुन यस्ता छन् योग्यता :

१, काठमाडौँ महानगरको स्थायी बासिन्दा वा महानगरको करदाता वा महानगरभित्र बसोबास गर्ने नेपाली नागरिक।

२, १८ वर्ष पुरा भई ६० वर्ष ननाघेको

आवश्यक कागजातहरू :

१, नेपाली नागरिकता को प्रतिलिपि

२, बसाई सराइको कागजात

३, भाडामा बस्ने भए घर बहाल सम्झौता को प्रतिलिपि

४, कर दाता भए कर तिरेको प्रमाणपत्र