१४ जिल्लाका ५ हजार बढीकाे स्वाब संकलन गर्दै सेना र प्रहरी

सरकारले कोरोना संक्रमणको जोखिम उच्च रहेका चार वटा प्रदेशका १४ जिल्लाबाट ५३०० जनाको स्वाब संकलन गर्ने योजना अनुसार नेपाली सेना, सशस्त्र प्रहरी र नेपाल प्रहरीको संयुक्त टोली परिचालन गरेको छ।

सरकारको कोभिड–१९ क्राइसिस म्यानेजमेन्ट सेन्टर (सीसीएमसी) ले शुक्रबार वैशाख २६ गते नेपाली सेनाको हवाई साधन तथा गाडीहरूबाट टोली पठाइएको जनाएको छ।

प्रदेश १ को उदयपुर, प्रदेश २ का बारा, पर्सा र रौतहट, गण्डकी प्रदेशको नवलपरासी पूर्व, प्रदेश ५ को नवलपरासी पश्चिम, अर्घाखाँची, रुपन्देही, गुल्मी, कपिलवस्तु, प्युठान, दाङ, बाँके र बर्दियातर्फ संयुक्त टोली पठाइएको हो।

सीसीएमसीले १४ जिल्लामा संक्रमणको जोखिम मध्यनजर गरी २८ वैशाखसम्म स्वाब संकलन गरी परिक्षणका लागि पठाउने कार्यक्रम रहेको जनाएको छ।