गोरखामा राष्ट्रिय परिचयपत्रको काम अब वडाबाटै हुने

गोरखा । गोरखामा राष्ट्रिय परिचय पत्रको काम वडा तहबाटै हुने भएको छ।

यसअघि जिल्ला प्रशासनमा हुँदै आएको परिचयपत्र विवरण संकलनको काम अब वडा तहबाटै गर्न लागिएको हो। विभागको आयोजनामा सोमबार जिल्ला प्रशासन कार्यालयमा अभियान सम्बन्धी अभिमुखीकरण कार्यक्रम समेत भएको छ ।

राष्ट्रिय परिचयपत्र तथा पञ्जीकरण विभागले पालिकाको प्रत्येक वडामा परिचयपत्रको लागि विवरण दर्ता अभियान सञ्चालन गर्ने भएको छ । प्रमुख जिल्ला अधिकारी शंकरहरि आचार्यले छिट्टै राष्ट्रिय परिचयपत्रका लागि विवरण दर्ता अभियान सञ्चालन गर्ने बताए ।

सम्भवतः यो हप्ताभित्रै अभियान सुरु गर्ने प्रमुख जिल्ला अधिकारी आचार्यले बताए । सबै पालिकाको वडा–वडामा स्टेशन राखेर विवरण दर्ताको काम हुने उनले बताए । एउटा वडामा दुई वटा स्टेशन राखिने र एउटा वडाको काम दश दिनमा सक्ने लक्ष्य लिएको उनले बताए । उनका अनुसार एक पटकमा दुई पालिकामा अभियान सञ्चालन हुनेछ ।

अभियानका लागि आवश्यक कम्प्यूटर अपरेटर विभागले पठाउने छ भने रुजुका लागी सम्बन्धित वडाको सचिव खटिने छन् । विवरण दर्ताका लागि आवश्यक जनशक्ति सम्बन्धित स्थानीय तहले गर्नेछन् ।

पालिकामा सञ्चालन हुने अभियानमा विवरण दर्ता मात्र हुने र ती विवरण यहाँ ल्याएर परिचयपत्र नम्बर यही प्रशासन कार्यालयमा जेनेरेट गर्ने उनले जानकारी दिए ।

तत्काल परिचयपत्र आवश्यक पर्नेहरुले भने प्रशासन कार्यालयमा आएर बनाउन सक्ने उनले जानकारी दिए । कार्यक्रममा प्रत्येक स्थानीय तहका प्रमुख एवं उपप्रमुख, प्रमुख प्रशासकीय अधिकृत, राजनीतिक दलका प्रतिनिधि सहभागी थिए ।