यूएईविरुद्ध फिल्डिङ गर्दै नेपाल

एसीसी महिला ट्वान्टी–२० च्याम्पियनसिपको सेमिफाइनलमा नेपालले आज यूएईविरुद्ध पहिले बलिङ गर्ने भएको छ ।

मलेसियाको किनरारा ओभलमा नेपालकी कप्तान रुविना क्षेत्रीले टस जितेर पहिले फिल्डिङ रोजेकी हुन् । यूएईले पहिले ब्याटिङ गर्ने भएको हो । 

नेपाल र यूएईबीच यस अघि ३ पटक प्रतिस्पर्धा भएको छ । जसमा दुई खेल नेपाल र एक खेल यूएईले जितेको छ ।

यूएई समूह ’ए’को विजेता बन्दै सेमिफाइनलमा स्थान बनाउन सफल भएको हो । नेपाल भने समूह ‘बी’को उपविजेता टोली हो । यूएईले ४ खेलमा ७ अंक जोडेको थियो भने मलेसिया ६ अंक जोडेर समूह उपविजेता बनेको थियो ।

समूह ‘बी’मा नेपालले ४ खेलमा ६ अंक जोडेको थियो । यो समूहबाट हङकङ ८ अंक जोडेर समूह विजेता बनेको थियो । नेपालले भुटान, कुवेत र बहराइनलाई हराउँदा हङकङसँग पराजित भएको थियो ।

अर्को सेमिफाइनलमा हङकङ र मलेसियाबीच प्रतिस्पर्धा हुनेछ । च्याम्पियनसिपको फाइनल शनिबार हुनेछ । फाइनल पुग्ने दुई टोली महिला टी–ट्वान्टी एसिया कप क्रिकेटमा छनोट हुनेछन् ।

नेपाली टिमः

रुविना क्षेत्री (कप्तान), अप्सरी बेगम, अस्मिना कर्मचार्य, डली भट्ट, इन्दु बर्मा, ज्योति पाण्डे, कविता कुँवर, विन्दु रावल, ममता चौधरी, संगिता राई, सिता रानामगर