कोरोना संक्रमित युवती र युवकको कस्तो छ पछिल्लाे अवस्था ?

नेपालमा अहिलेसम्म कोरोना भाइरसबाट संक्रमित तीन जना देखिएका छन्। तीमध्ये सुरुमा संक्रमण पुष्टि भएका एक पुरुष उपचारपछि स्वस्थ भएर पनि आफ्नो नियमित काममा फर्किसकेका छन् भने बाँकी दुई जनाको उपचार जारी छ।

टेकुस्थित शुक्रराज ट्रपिकल तथा सरुवा रोग अस्पतालमा कोरोना संक्रममित एक युवती र युवकको उपचार भइरहेको हो।

स्वास्थ्य तथा जनसंख्या मन्त्रालयका प्रवक्ता डा. विकास देवकोटाले शुक्रबार बिहानै नेपालखबरलाई दिएको जानकारीअनुसार कोरोना संक्रमित १९ वर्षीया युवतीको अवस्था सामान्य छ भने अर्का संक्रमित ३२ वर्षीय युवकलाई भने खोकी लागिरहेको छ।

फ्रान्समा पढ्ने गरेकी ती युवती कतार हुँदै विमानमार्फत नेपाल आएकी थिइन् भने ती युवक यूएईबाट आएका हुन्।

त्यसयता अर्का संक्रमित फेला नपरेको स्वास्थ्य मन्त्रालयले जनाएको छ।