लाप्राकमा सुरु भयो ‘नेपाल ग्रामीण चलचित्र महोत्सव’

गोरखा। ‘नेपाल ग्रामीण चलचित्र महोत्सव’ गोरखा जिल्लाको दुर्गम मानिने लाप्राक गाउँमा मंगलबारबाट सुरु भएको छ । सेलिब्रेटी नेपाल अयोजक रहेको महोत्सव धार्चे गाउँपालिका –४ लाप्राक गाउँपालिका अध्यक्ष सन्त बहादुर गुरुङले उद्घाटन गरे ।

कार्यक्रममा अध्यक्ष गुरुङले गाउँमा चलचित्र महोत्सव हुँदा खुशी लागेको बताउँदै महोत्सवले गाउँको पर्यटन प्रवद्र्धनमा समेत टेवा पुग्ने विश्वास ब्यक्त गरे । स्थानीय व्यवस्थापक राज गुरुङको सभापतित्वमा आयोजित उद्घाटन कार्यक्रममा राज सागरको टिमले नेपाली फिल्मका गीतमा प्रस्तुती दिए भने गुरुङ फिल्म ‘फुङ’बाट फिल्म प्रदर्शनी सुरु भयो ।

मंगलबारै स्थानीयसँग ग्रामीण चलचित्र सम्बन्धि अन्तरक्र्रिया समेत आयोजना भयो । बुधबारसम्म चल्ने महोत्सवमा विभिन्न भाषामा बनेका अन्य सांस्कृतिक चलचित्र, वृत्तचित्र, सर्टमुभी र फिचर फिल्मसमेत प्रदर्शन गरिने आयोजक संस्थाका अध्यक्ष रघुनाथ सापकोटाले जानकारी दिए ।

कलाकार रबिन्द्र खड्का, लेखक एवं निर्देशक शिवम अधिकारी, सम्पादक शिव पुरी, साउन्ड एडिटर किशोर आचार्य, पत्रकार तथा निर्देशक लक्ष्मण सुवेदी महोत्सवको जुरी रहेका छन् । जुरी टिमले छनोट गरेका उत्कृष्ट ९ विधामा अवार्ड समेत वितरण गर्दै महोत्सव सकिनेछ ।

नेपाल चलचित्र विकास वोर्डसँगको सहकार्य रहेको महोत्सवको सह–आयोजकमा ‘भ्वाइस अफ नेपाल म्युजिक इण्डष्ट्रिज’ रहेको छ । महोत्सवमा काठमाडौंबाट गजित विष्ट, पनाह अधिकारी, छिरिङ भुटीया लगायतका फिल्मकर्मीहरु लाप्राक पुगेका छन्, भने स्थानीयहरुको उत्साहजनक उपस्थिति छ । गाउँमा यसप्रकारको कार्यकक्रम हुँदा खुशी लागेको स्थानीयहरुले बताए ।

नेपाली मौलिक चलचित्र, चलचित्रकर्मी र स्थानीय पर्यटकीय स्थलको प्रचारप्रसार तथा प्रवद्र्धन गर्नु, नेपाली आम दर्शकलाई नेपाली मौलिक चलचित्र प्रति आकर्षित गराउनु र नियमित चलचित्र हेर्ने बानी बसाल्नु, नेपाली समाजका मौलिकता बोकेका र ग्रामीण कथामा बनेका चलचित्रहरूलाई स्वदेशी तथा विदेशी दर्शकमाझ पुर्याउनु र स्थानीय क्षेत्रको भाषा, कला, संस्कृति एवं पर्यटकीय क्षेत्रको प्रवर्धन गर्ने लगायतका उद्धेश्यले महोत्सव गरिएको आयोजक सेलिब्रेटी नेपालले जानकारी दियो ।