एसइई परीक्षा केन्द्रमा ‘हेल्थ डेस्क’

काठमाडौं– शिक्षा, विज्ञान तथा प्रविधि मन्त्रालयले आगामी बिहीबारदेखि शुरु हुने माध्यमिक शिक्षा परीक्षा (एसईई) सावधानीपूर्वक सञ्चालन गर्न अपिल गरेको छ ।

शिक्षा, विज्ञान तथा प्रविधिमन्त्री गिरिराजमणि पोखरेलले सोमबार अपिल जारी गर्दै परीक्षा सञ्चालनको सबै तयारी पूरा भएको बताएका हुन् ।

उनले ६ देखि १७ चैतसम्म हुने परीक्षामा देशभरका कुल ४ लाख ८२ हजार २१९ परीक्षार्थी सहभागी हुने जनाएका छन् । एसइई परीक्षाका लागि १ हजार ९९५ परीक्षा केन्द्र तोकिएको छ ।

मन्त्री पोखरेलले परीक्षा केन्द्रमा परीक्षा अवधिभर हेल्थ डेस्क राख्ने प्रबन्ध मिलाउन समेत ७ सय ५३ स्थानीय निकायलाई अनुरोध समेत गरेका छन् ।

मन्त्री पोखरेलले जारी गरेको अपिलमा भनिएको छ, ‘यतिबेला कोरोनाको संक्रमण रोकथाम गर्ने र एसइई परीक्षलाई मनोबैज्ञानिक एवं त्रासमुक्त वातावरणमा सम्पन्न गर्ने जिम्मेवारी पूरा गर्नुपर्ने स्थिति छ ।’

उनले विद्यार्थीको स्वास्थ्य सुरक्षा र वचावट पहिलो प्राथमिकता रहेको बताउँदै यस्तो अवस्थामा पनि बालबालिकाहरुको पढ्न पाउने हक अधिकार सुरक्षित हुनु पर्दछ भन्ने विषयमा नेपाल सरकार गम्भीर रहेको उल्लेख गरेका छन् ।