भीमसेन थापा गाउँपालिकाको सबै वडामा व्यक्तिगत घटना दर्ता अनलाइनमार्फत

गोरखा। भीमसेन थापा गाउँपालिकामा सम्पूर्ण वडाहरुमा अनलाइन व्यक्तिगत घटना दर्ताको काम शुरु भएको छ ।

आइतबार गाउँपालिका वडा नं ५ की सोफिया ढकालको जन्मदर्ता गरी अनलाइनमा घटना दर्ता गरी अन्य वडाहरुमा समेत विस्तार गरेर पूर्ण अनलाइन गाउँपालिका घोषणा गरिएको गाउँपालिकाकी सूचना तथा संचार प्रविधि अधिकृत सविना लामिछानेले जानकारी दिईन् ।

गाउँपालिकालाई प्रविधिमैत्री बनाउन अनलाइनमार्फत व्यक्तिगत घटना दर्ता र सामाजिक सुरक्षा शुभारम्भ गरिएको उनले बताइन् ।

आइतबारबाट पालिकाका सबै वडामा लागु हुने गरी कार्यक्रम सुरुवात गरिएको उनले बताइन् । अब पालिकाभित्रका व्यक्तिगत घटना र सामाजिक सुरक्षाका सबै अनलाइनमा दर्ता हुने बताइन् ।

व्यक्तिगत घटना दर्ता तथा सामाजिक सुरक्षाका कार्यहरु अनलाइनमा दर्ता गर्नाले तथ्यांक सुरक्षित हुने लामिछानेले बताइन् । विभिन्न घटनाहरु हेर्न सजिलो, छिटो हुने, फाइलहरु हराउने सम्भावना कम हुने, फाइल हराउने समस्याबाट मुक्त हुने उनले जानकारी दिइन् ।

कार्यक्रममा गाउँपालिका अध्यक्ष इश्वर पाण्डे, उपप्रमुख विनु वाग्ले, वडा नम्बर पाँचका वडा अध्यक्ष प्रेमचन्द्र श्रेष्ठ, पालिकाका प्रमुख प्रशासकीय अधिकृत चित्रबहादुर अधिकारी लगायतका जनप्रतिनिधि, गाउँपालिका कर्मचारी र स्थानीयहरुको सहभागिता रहेको थियो ।