विदेशमा रहेका आफ्ना नागरिककाे तथ्यांक संकलन गर्दै गोरखा नगरपालिका र शहिद लखन

गोरखा । गोरखा नगरपालिका र शहिद लखन गाउँपालिकाले विदेशमा रहेका आफ्ना नागरिककाे लगत संकलन थालेका छन् । गोरखा र शहिद लखनले पालिका क्षेत्रमा बसाेबास रहेका तर हाल वैदेशिक रोजगारी, वैदेशिक अध्ययनमा रहेका नागरिककाे तथ्यांक संकलन सुरु गरेका हुन् ।

वैदेशिक रोजगारमा रहेका नागरिक र उनीहरुको परिवारको अवस्था लगायतकाे तथ्यांक तथा अवस्था पहिचानको लागि लगत सुरु गरिएकाे गोरखा नगरपालिकाका सामी परियोजना सम्पर्क व्यक्ति तथा सामाजिक बिकास अधिकृत बिजय भक्त उपाध्यायले जानकारी दिए ।

• 

• 

पालिकाले वैदेशिक रोजगार सम्बन्धी पार्श्वचित्र निर्माण गर्ने उदेश्यले तथ्यांक संकलन थालिएकाे उनले बताए । गोरखा नगरपालिका र शहिद लखन गाउँपालिकाले वैदेशिक रोजागारीको विवरण संकलन गरी ‘आप्रवासन प्रोफाईल’ निर्माण गर्ने जनाएका छन् ।

संकलन गरेको तथ्याङक प्रोफाइलका रुपमा राखिने र आगामी नीति तथा कार्यक्रम बनाउदा त्यसैका आधारमा तयार गरिने उपाध्यायले बताए । प्रोफाईलले सुरक्षित आप्रवासन नीति र पुनः एकीकरणको लागि समर्थन सहित स्थानीय ‘प्रवास प्रशासन’ को लागि उचित योजना, नीति र रणनीतिको विकासमा सहयोग गर्ने छ ।

• 

• 

प्रोफाईल निर्माणको लागि गोरखा नगरपालिकाले पाँच लाख र शहिद लखन गाउँपालिकाले चार लाख रुपैया विनियोजन गरेका छन् । हाल प्रत्येक वडामा एक जना गणकको व्यवस्थापन गरी क्षेत्रगत तथ्याङ्क संकलन भैरहेको बताइएकाे छ ।

गोरखा नगरपालिकाले १४ र शहिद लखन गाउँपालिकाले आठ जना गणक छनौट गरी तथ्याङ्क संकलन गर्न थालेका हुन्। गणकहरुले ‘कोवो सफ्टवेयर’ मार्फत तथ्यांङ्क लिइरहेका छन् । एकिकरण नेपालको व्यवस्थापनमा गणकहरुलाई सामी हेल्भेटासले दुई दिने सफ्टवेयर सञ्चालनबारे प्राविधिक तालिम दिएर स्थलगत रुपमा तथ्याङ्क संकलनका लागि वडामा खटाइएको छ ।

स्थलगतरुपमा खटाइएका २२ गणकहरुले फाल्गुन ४ भित्र आफ्नो जिम्मेवारीमा परेको वडाको वैदेशिक रोजगारीमा गएको, अध्ययनका लागि गएको, वैदेशिक रोजगारीमा आश्रीत परिवार, वैदेशिक रोजगारीमा फर्केका, रोजगारीबाट फर्केर पुनस्थापित भइसकेकाको विवरण संकलन गर्नेछन् ।

• 

• 

प्रोफाईलमा जनसांख्यिकीय जानकारी, प्रमुख गन्तव्य देशहरू, प्रवासी र उनीहरूका परिवारको सीप र सूचनामा पहुँचको हालको परिदृश्य, रेमिट्यान्स प्राप्त गर्ने र वित्तीय साक्षरतामा यसको उपयोगिताको प्रवृत्ति र ज्ञान स्तर सहितको प्रवास, पुनरागमन प्रवासी कामदारको जानकारी, उनीहरूको अवस्था र पहलमाथि जोड दिने शहिद लखन गाउँपालिकाले जनाएकाे छ।

• 

• 

आप्रवासन पाश्र्वचित्रले राष्ट्रिय सन्दर्भसँग सम्बन्धित स्थानीय स्तरबाट श्रम प्रवासन ढाँचाको समग्र परिदृश्य प्रतिबिम्बित गर्ने सुरक्षित आप्रवासन परियोजना (सामी) गोरखाका परियोजना संयोजक चन्द्र देवकोटाले बताए । पाश्वचित्रमा वैदेशिक रोजगारमा धोखाधडी र सम्बन्धित मुद्दाहरू, सामाजिक लागत, चुनौती साथै सुझावलाई पनि समावेश गरिने उनले बताए ।