बाढी-पहिरोले क्षतिग्रस्त मेलम्चीको मुहान पुनः सडक सञ्जालमा जोडियो

गएको वर्खामा गएको बाढीपहिरोले क्षतिग्रस्त सिन्धुपाल्चोकको मेलम्ची खानेपानी आयोजनाको मुहान पुनः सडक सञ्जालमा जोडिएको छ।

बाढीपहिरोले बगाएको मेलम्ची बजारदेखि आयोजनाको मुहानसम्म अस्थायी सडक र पुल निर्माण गरेपछि खानेपानीको मुहान क्षेत्र पुनः सडक सञ्जालमा जोडिएको मेलम्ची खानेपानी आयोजनाले जनाएको छ।

गएको असारमा आएका दुईवटा ठूला बाढीले मेलम्ची खानेपानी आयोजनासम्म पुग्ने सडक र पुल बगाएको थियो। जसको कारण मेलम्चीको मुहानसम्म सडक सम्पर्क विच्छेद भएको थियो। बाढीले बगाएको ६ किलोमिटर सडक र पाँचवटा पुलमा अस्थायी संरचना निर्माण गरेपछि मुहान क्षेत्र सडक सञ्जालमा जोडिएको हो।

आयोजनाका प्रवक्ता राजेन्द्रप्रसाद पन्तका अनुसार मेलम्चीको मुहान स्थलसम्म पुग्न अस्थायी रूपमा सडक र पुल निर्माण गरिएको छ। यसअघि सडकमार्ग भएर आयोजना स्थलसम्म पुग्न नसक्दा आयोजनाको मुहान, हेड वक्र्स र सुरुङमा पुगेको क्षतिबारे यकिन हुन सकेको थिएन। अब सहज रूपमा क्षतिको अवलोकन गरेर पुनर्निर्माणको काम अघि वढाउने तयारी आयोजनाले गरेको छ।

मेलम्ची खानेपानी आयोजना पुनः सञ्चालनमा ल्याउन अर्थ मन्त्रालयले डेढ अर्ब रुपैयाँ निकासा गरेको छ।