चरेस बोकेर कतार जान लागेका २ जना विमानस्थलबाट पक्राउ

लागूऔषध चरेस बोकेर कतारको दोहा जान लागेका दुई जना त्रिभुवन अन्तर्राष्ट्रिय विमानस्थलबाट पक्राउ परेका छन् ।

विमानस्थलको प्रस्थान कक्षबाट ४ किलो ३५ ग्राम अवैध लागूऔषध ‘चरेस’ सहित दुईजनालाई पक्राउ गरिएको लागु औषध नियन्त्रण ब्यूरोले जानकारी दिएको छ ।

पक्राउ पर्नेमा म्याग्दीको मंगला गाउँपालिका–३ घर भएका ३६ वर्षीय श्याम प्रसाद रोका र ३५ वर्षका वीर बहादुर रोका मगर छन् ।

सोमबार बिहान उनीहरु कतार एअरको उडानमार्फत दोहा जान लागेका थिए । विमानस्थलमा खटिएको प्रहरीले चेकजाँच गर्दा उनीहरुको सुटकेसभित्र चरेश फेला परेको थियो ।

लागूऔषध ‘चरेस’ मुद्दामा जिल्ला अदालत काठमाडौंबाट म्याद लिएर उनीहरुमाथि ब्यूरोले अनुसन्धान गरिरहेको छ । कतारमा सो चरेस पठाउने मुख्य आरोपी फरार छन् ।