२८ भदौदेखी गोरखा नगरपालिकाका विद्यालय खुल्ने

गोरखा नगरपालिकाका सबै विद्यालय २८ भदौदेखि सञ्चालन हुने भएको छ ।

कोभिड १९ को संक्रमण बढेपछि पाँच महिनादेखी बन्द रहेका विद्यालयहरु आउँदो सोमबारदेखि भौतिक उपस्थितिमा सञ्चालन हुने नगरपालिकाको शिक्षा, युवा तथा खेलकुद शाखाले जनाएको छ ।

शाखामा आइतबार शिक्षासँग सम्बन्धित सरोकारवालाहरुको सम्पन्न बैठकपछिको सिफारिसमा नगर शिक्षा समितिले स्वास्थ्य मापदण्ड पूरा गरी विद्यालय खुलाउने निर्णय गरेको हो ।

भदौ २८ गतेदेखि २५० जनासम्म विद्यार्थी भएका विद्यालयहरुमा तोकिए बमोजिमको स्वास्थ्य मापदण्ड पूरा गरी एक सिफ्टमा भौतिक रुपमा विद्यालय सञ्चालन गर्ने निर्णय भएको शाखाका स्रोत शिक्षक ध्रुवराज अर्यालले जानकारी दिए ।

सो भन्दा धेरै विद्यार्थी भएका विद्यालयहरुमा व्यवस्थापन समितिबाट कार्यविधि स्वीकृत गराई एक सिफ्टमा चार घण्टाको अवधि नघट्ने गरी भौतिक उपस्थितिमा पठनपाठन गर्ने, गराउने निर्णय गरिएको हो ।

हरेक विद्यालयले विद्यालय व्यवस्थापन समितिबाट स्वीकृत भएको कार्यविधि शिक्षा, युवा तथा खेलकुद शाखामा पेश गर्नुपर्ने बैठकले निर्णय गरेको उनले बताए ।

कोभिडका कारण विद्यालयहरु गत बैशाख महिनादेखि बन्द गरेको थियो ।