बाढी र पहिरोले १६ वटा सडक बन्द, सडक तत्काल खुलाउने गरी १ सय ९५ ठाउँमा हेभी इक्युपमेन्ट तयारी अवस्थामा

काठमाण्डौ । बाढी र पहिरोका कारण देशका १६ वटा सडक बन्द भएका छन् ।

मनसुन सुरु भएपछि पहिरो तथा बाढीका कारण बन्द भएका राजमार्गसहितका ५१ वटा सडकमध्ये २४ वटा एकतर्फी सञ्चालनमा आएका छन् । एघार वटा सडक भने मर्मतपछि नियमित सञ्चालनमा आइसकेका छन् ।

डुम्रे–बेसीसहर–चामे सडक खण्ड अन्तर्गत मनाङ र लमजुङका विभिन्न भागमा सडक भत्केको छ । मनाङको तिमाङ छहरामा गएको जेठ ३१ गते तथा धारापानी, बगरछापलगायतका ठाउँमा असार ३ गतेदेखि बन्द सडक आउँदो २० गतेसम्म खुलाउने गरी तयारी भइरहेको छ । अरनिको राजमार्ग अन्तर्गत काठमाण्डौ–कोदारी सडक सिन्धुपाल्चोकमा आएको बाढी र पहिरोले बन्द छ । त्यस्तै रसुवाको स्याब्रुबेसी–रसुवागढी तथा मैलुङ–स्याब्रुबेसी सडक बन्द छ ।

बाढी र पहिरोले सडक बन्द भइहाले तत्काल खुलाउने गरी तयारीका लागि १ सय ९५ ठाउँमा हेभी इक्युपमेन्ट तयारी अवस्थामा राखिएको सडक विभागले बताएको छ ।