यास चक्रवातको प्रभाव : शनिबारसम्म वर्षा जारी रहने, सतर्कता अपनाउन आग्रह

काठमाडौं । भारतमा विध्वंस मच्चाएको शक्तिशाली चक्रवात यासको प्रभावले केही दिनयता नेपालमा वर्षा र हिमपात जारी छ। यो क्रम कम्तीमा शनिबारसम्म जारी रहने मौसम पूर्वानुमान महाशाखाले जनाएको छ।

• 

• 

महाशाखामा कार्यरत मौसमविद् मञ्जु बासीका अनुसार काठमाडौं उपत्यकासहित देशका विभिन्न स्थानमा बुधबार रातिदेखि वर्षा भइरहेको छ। यसबीच कतिपय स्थानमा भारी वर्षासमेत भएको छ।

उनका अनुसार बागमती, गण्डकी र लुम्बिनी प्रदेशका धेरै स्थानमा हल्कादेखि मध्यमसम्म वर्षा भएको छ, प्युठानमा भारी वर्षा भएको छ। यसैगरी प्रदेश १ र २ मा पनि हल्कादेखिम मध्यमसम्म वर्षा भएको छ। सुदूरपश्चिम एउटा प्रदेशमा मात्र वर्षा भएको छैन।

अहिले पनि प्रदेश १, प्रदेश २ बागमती प्रदेश, गण्डकी र लुम्बिनी प्रदेशका केही स्थानमा वर्षा जारी छ। मौसमविद् बासीका अनुसार तर रातिभन्दा अहिले वर्षा केही कम भएको छ।

यासको प्रभाव अझै केही दिन रहने र अहिलेसम्मको अनुमानअनुसार कम्तीमा शनिबारसम्म (सामान्यतया तीन दिनसम्मको मौसम अनुमान गर्ने गरिन्छ) वर्षा र हिमपातको क्रम जारी रहने देखिएकाले होसियारी अपनाउन मौसमविद्ले आग्रह गरेका छन्।

प्रदेश १, प्रदेश २, बागमती, गण्डकी, लुम्बिनी र कर्णाली प्रदेशका केही स्थानमा र बाँकी प्रदेशको एक वा दुई स्थानमा मेघगर्जन/चट्याङसहित हल्कादेखि मध्यम वर्षाको सम्भावना छ।

गण्डकी, बागमती र प्रदेश १ का हिमालीरउच्च पहाडी भूभागका केही स्थानमा हल्कादेखि मध्यम हिमपातरवर्षाको सम्भावना रहेकाले आवश्यक सतर्कता अपनाउन हुन अनुरोध छ।