जिप दुर्घटना हुँदा दुई जनाको मृत्यु

मालबहाक जिप दुर्घटना हुँदा २ जनाको मृत्यु भएको छ।

पाल्पाको तानसेन नगरपालिका वडा नम्बर ७ काजिपौवामा कुखुरा बोकेको उक्त जिप गए राति करिब १२ः२० बजे दुर्घटनामा परेको थियो।

दुर्घटनामा परेको लु २ च ६३२ नम्बरको जिप तानसेनतर्फ आउँदै गर्दा कच्ची सडकबाट करिब २० मिटर तल खसेको प्रहरी नायव उपरीक्षक रामेश्वर त्वातीले जानकारी दिए ।

दुर्घटनामा परेर जिपका चालक पाल्पाको बगनासकाली गाउँपालिका वडा नम्बर ४ का २० वर्षीय विजय खाम्चा र पाल्पा रिब्दीकोट गाउँपालिका वडा नम्बर ४ का २७ वर्षीय राज थापाको मृत्यु भएको उनले बताए।

गम्भीर घाइते भएका उनीहरूलाई यूनाइटेड मिसन अस्पताल पाल्पा लगिएकोमा चिकित्सकहरूले मृत घोषणा गरेका थिए। दुर्घटनाबारे थप अनुसन्धान जारी रहेको उनले बताए।