अजिंगर भीर फोरेर सडक

म्याग्दी । अजिंगर भीर फोरेर रघुगंगा–४ को दग्नाम र दर्मिजा बस्ती जोड्ने सडकको ट्रयाक खुलेको छ ।

राहुघाट करिडोरमा पञ्चायतकालदेखि सबैभन्दा बढी राजनीति भएको भीरमा ट्रयाक खुलेसँगै दर्मिजा, चिमखोला, मंगले, घ्याँसीखर्क र मौवाफाँटसमेत सडक सञ्जालसँग जोडिएका छन् ।

म्याग्दीको रघुगंगा गाउँपालिका–४ दग्नाम–दर्मिजा बस्तीबीचको अजिंगर भीर फोडिएपछि सडकको ट्रयाक खुलेको हो ।

उक्त भीरको बाटोमा हिँड्दा विगतमा दुई दर्जनभन्दा बढी पैदलयात्रुले ज्यान गुमाइसकेका छन् । भीर फोरेर पञ्चायतदेखि नै गोरेटो, घोडेटो र सहज सडक बनाउँछौं भन्नु हरेक चुनावमा भोट माग्ने बहाना बनेको थियो ।

दग्नाम–चिमखोला ४.८१ किलोमिटर सडक खन्न हालसम्म ८ करोड बढी भुक्तानी भइसकेको छ । त्यसमा ८ सय मिटर अजिंगर भीर र ६ सय ३० मिटर दर्मिजा–चिमखोलाखण्डको गोखोभीरको रक कटिङको काम पनि पर्छ । पहरामा सडक कम्तीमा ७ देखि १० मिटरसम्म चौडा रहेको गाउँपालिकाले जनाएको छ ।

अजिंगर भीर फोर्न साझेदार तुँदीपावर कम्पनीका प्रतिनिधि इन्द्र ढकालले कटिङको काम अझै भइरहेको बताए । खुलेको ट्रयाकमा गाडी गुड्न मिल्ने बनाउने काम भइरहेको गाउँपालिकाका सबइन्जिनियर कमल चोखालले बताए ।

संघ, प्रदेश र स्थानीय सरकारको प्रयासबाट ट्रयाक खुलेको स्थानीय अगुवा गम पुनले बताए ।अझै एक करोड ४० लाखको बजेट रहेकाले छिट्टै गाडी गुड्ने विश्वास रहेको पुनको भनाइ छ ।