७ घण्टे उडानको सबै टिकट १० मिनेटमै बुक

अष्ट्रेलियाको राष्ट्रिय ध्वजावाहक कन्टास एयरलाइन्सको इतिहासमै पहिलोपटक १० मिनेटमै सबै टिकट बुकिङ भएको छ । उडानका लागि हालै १३४ सिटका लागि टिकट बुकिङ खुलाइएको थियो।

कोरोना प्रकोपका कारण सबै अन्तर्राष्ट्रिय उडान बन्द छन् । कोरोना भाइरस को महामारीका कारण मानिसलाई भ्रमण गर्न निकै गाह्रो भइरहेको छ।

अष्ट्रेलियाको राष्ट्रिय ध्वजावाहक ‘कन्टास’ एयरलाइन्सले कहीँ पनि नपुगिने ७ घण्टे उडानको एउटा रमाइलो योजना ल्याएको छ। यस योजनाको अर्थ अस्ट्रेलियाका नागरिकलाई कोरोना प्रकोपबीच तनावमुक्त बनाउनु हो।

आगामी अक्टोबर १० मा कन्टासले सिड्नीबाट ७ घण्टाका लागि उडान भर्नेछ। विमानले यात्रुलाई आकाशमै घुमाएर फेरि सिड्नीमै ओह्राल्नेछ। सो क्रममा विमान अलुरु, काटा जुटा, द विटसन्डेज, गोल्ड कोस्ट, बाइरन बे र सिड्नी हार्बोरमाथि उड्नेछ।

कन्टासले इतिहासमै पहिलोपटक यति चाँडै टिकट बुकिङ भएको जनाएको छ।

उक्त टिकटका मूल्यहरु ७८७ अस्ट्रेलियन डलरदेखि ३७ सय ८७ डलरसम्म तोकिएको थियो।