क्रिकेट खेलाडीले पाए एकमुष्ट तलब

नेपाली राष्ट्रिय क्रिकेट टोलीका पुरुष खेलाडीले गत वर्षदेखि रोकिएको पारिश्रमिक बिहीबार पाएका छन्।  

नेपाल क्रिकेट संघ (क्यान) ले विज्ञप्ति जारी गर्दै सम्झौता भएका खेलाडीको तलब वितरण गरेको जनाएको हो। अन्तर्राष्ट्रिय क्रिकेट परिषद् (आइसिसी) बाट रकम प्राप्त भएसँगै क्यानले खेलाडीको एक वर्षको एकमुष्ट तलब खेलाडीको खातामा जम्मा गरेको हो।  

वर्गीकरण सम्झौताभन्दा मासिक १० हजार बढी रकम पाएको समेत जनाइएको छ। क्यानको पहलमा खेलाडीको मासिक तलबमा १० हजार वृद्धि गर्न आइसिसी सहमत भएको थियो।

क्यानले राष्ट्रिय टोलीका सदस्यलाई तीन श्रेणीमा विभाजन गरेको थियो। श्रेणीअनुसार तलब प्रदान गरेको हो। ‘ए’ श्रेणीका खेलाडीले ४५ हजार, ‘बी’ श्रेणीका खेलाडीले ३५ हजार र ‘सी’ श्रेणीका खेलाडीले मासिक २५ हजारको दरले तलब पाएका हुन्।  

‘ए’ श्रेणीका खेलाडीले एक वर्षको एकमुष्ट ५ लाख ४० हजार, ‘बी’ श्रेणीका खेलाडीले ४ लाख २० हजार र ‘सी’ श्रेणीका खेलाडीले ३ लाख रुपैयाँ पाएका छन्।