एनआरएनएले कराेडाै खर्चेर बनाएकाे गुप्सीपाखामा किन बस्दैनन् लाप्राकी ?

गोरखा । गैरआवासिय नेपाली संघ एनआरएनएले गुप्सीपाखाको एकिकृत नमूना बस्ती निर्माण गरी हस्तान्तरण गरेको साढे दुई वर्ष बित्यो । भूकम्पको केन्द्रबिन्दु बारपाक नजिकै लाप्राकको गुप्सीपाखामा ५७३ घर बनाइएको छ ।

बर्षौदेखि पहिरोको समस्यामा रहेको लाप्राकको पुरानो बस्ती भुकम्प पछि थप जोखिमयुक्त भएपछि गुप्सीपाखामा नयाँ बस्ती बनाउने निर्णय भएको थियो ।  सोही अनुरुप २०७३ बैशाख १२ गते एनआरएन, पुर्ननिर्माण प्राधिकरण र स्थानिय वीच सम्झौता भएको थियो ।

एनआरएनएले पाँच वर्ष लगाएर बस्ती निर्माण गरी २०७८ बैखाश ९ गते बस्ती हस्तान्तरण गर्यो । तर ५७३ घर मध्ये करिब ५० घरमा मात्र अहिले मान्छे बस्छन् । केही घरमा होमस्टे चलाइएको छ ।

समय समयमा आएर रेखदेख गर्ने समेत गर्दा करिब ५० वटा घर प्रयोगमा आएको जस्तो देखिन्छ । अन्य सबै घर यसै थोत्रिन लागेका छन् । ‘एनआरएनएले घर त बनाइएदियो तर हामीले खोजे जस्तो बनेन्,’ स्थानीय ज्योती गुरुङले भनिन्, ‘झ्याल ढोका पनि काम लाग्ने खालको छैन्, नयाँ बनाएर बस्नु पर्छ ।’

सार्वजानिक तथा सामुदायिक वनको कुल १८।३२ हेक्टर क्षेत्रफलमा उक्त बस्ति बनाइएको छ । प्रतिघरधुरी करिब ४ आना दरले घडेरी कायम गरी लालपुर्जा वितरण गरिएको छ । उक्त वस्ती निर्माण गर्दा प्रतिघर १० लाखका दरले करिब ७५ करोड ६६ लाख रुपैयाँ खर्च भएको एनआरएनएले जानकारी दिएको छ।