बालुवाटारमा कांग्रेस शीर्ष नेताहरुको बैठक

काठमाडौं। नेपाली कांग्रेसका शीर्ष नेताहरुको बैठक प्रधानमन्त्री निवास बालुवाटारमा जारी छ।

पार्टीका पदाधिकारी र पूर्वपदाधिकारीहरुको बैठक जारी रहेको प्रधानमन्त्री एवं पार्टी सभापति शेरबहादुर देउवाको सचिवालयले जनाएको छ।

सचिवालयका अनुसार पार्टीका विभाग गठनलगायत आन्तरिक विषय,आसन्न संघ र प्रदेश सभा निर्वाचनको तयारीलगायत विषयमा छलफल भइरहेको छ।

आजै दिउँसो ३ बजे कार्यदलको बैठक बस्दैछ। कार्यदलमा कांग्रेसबाट कृष्ण प्रसाद सिटौला,गगन थापा र ज्ञानेन्द्रबहादुर कार्की सहभागी छन्।

सत्ता गठबन्धनले आगामी मंसिर ४ मा हुने संघ र प्रदेश सभा निर्वाचनमा सिट बाँडफाट गर्न ११ सदस्यीय कार्यदल गठन गरेको छ। 

सरकारले निर्वाचनको मिति तय गरेसँगै राजनीतिक दलहरु आन्तरिक छलफललाई तीव्र पारेका छन्।