प्रेस युनियनकाे नवाै महाधिवेशनबाट रेडियाे तर्फकाे सचिवमा गोरखाका सापकाेटा विजयी

गोरखा । नेपाल प्रेस युनियनको नवौँ महाधिवेशनबाट गोरखाका नरहरि सापकोटा रेडियोतर्फको सचिवमा निर्वाचित भएका छन् । प्रतिस्पर्धी डम्बर बमलाई पछि पार्दै सापकोटा विजयी भएका हुन् ।

नेपाल पत्रकार महासंघ गोरखाका अध्यक्ष रहेका सापकोटा प्रेस युनियन गोरखाका उपाध्यक्ष समेत हुन् । डेढ दशकदेखि गोरखालाई कार्यक्षेत्र बनाएर पत्रकारिता गर्दै आएका सापकाेटा दरौँदी दैनिक, रेडियो गोरखा र नागरिक दैनिकमा कार्यरत छन् ।

त्यस्तै महाधिवेशनबाट प्रेस युनियनको अध्यक्षमा शिव लम्साल विजयी भएका छन्।

हेटौँडामा भएको महाधिवेशनको आइतबार भएको अन्तिम मतगणनाबाट वरिष्ठ उपाध्यक्षका उम्मेदवार प्रेम केसी र महासचिवका उम्मेदवार दिलिप पौडेलसहितले विजय हासिल गरेका हुन्।

अध्यक्ष, वरिष्ठ उपाध्यक्ष तथा महासचिवसहित अधिकांश पदमा संस्थापन पक्ष पराजित भएकाे छ। अध्यक्षमा संस्थापन पक्षकी अनिता विन्दुलाई लम्सालले हराएका हुन्। त्यस्तै, वरिष्ठ उपाध्यक्षमा प्रेमले सरोज अधिकारीलाई पराजित गरे।

उपाध्यक्षमा नकुल अर्याल र भीष्मराज ओझा निर्वाचित हुँदा राममणि दाहाल र शेखर रेग्मी पराजित भएका छन्।

त्यस्तै, उपाध्यक्ष महिलामा कोइराला पक्षकी सलोजा दाहालले संस्थापनकी कल्पना शर्मालाई पराजित गरेकी छिन्।

उपाध्यक्षमा बागमतीमा जीवन भण्डारी विजयी भएका छन्। महासचिवमा दिलिपले जगन्नाथ दुलाललाई पराजित गरे।

सचिवमा मेनुका ढुंगाना निर्वाचित भएका छन् ।