स्थानीय तहकाे निर्वाचनका लागि गोरखामा १५ सय १८ कर्मचारी खटिँदै

गोरखा। बैशाख ३० गते हुने स्थानीय तहको निर्वाचनका लागि गोरखामा १५ सय १८ कर्मचारी खटिने भएका छन्।

जिल्लाका ११ वटा स्थानीय तहमा १५ सय १८ कर्मचारी खटाइने निर्वाचन आयोगले जनाएको छ । उक्त कर्मचारीको बिवरण मुख्य निर्वाचन अधिकृतको कार्यालयले आईतवार सार्वजनिक गरेको हो । निर्वाचन आयोगले बैशाख ३० को निर्वाचनको लागि कर्मचारी परिचालन गर्न शुरु गरिसकेको छ।

स्थानीय तहको निर्वाचनमा कर्मचारी खटाउँदा करिब ५० प्रतिशत महिलाहरु समेटिएको मूख्य निर्वाचन अधिकृत दीनबन्धु बरालले बताए । चुमनुब्री, धार्चे लगायत दुर्गम पालिकाका कर्मचारी तालिम लिन सदरमुकाम आउनुपर्ने, आउजाउमा धेरै दिन लाग्ने भएकाले छिट्टै कर्मचारी तोकिएको उनले बताए ।

निर्वाचनमा खटिने कर्मचारीलाई २२ देखि २४ गतेसम्म तालिम दिइनेछ । तालिमपछि उनीहरु सम्बन्धित केन्द्रमा तीन दिन अघि खटिनेछन् । सबै मतदान केन्द्रमा ६४ प्रकारमा निर्वाचन सामग्री पठाउने निर्वाचन कार्यालयका नायब सुब्बा रविलाल सुवेदीले बताए ।

साथै चार प्रकारका मतदाता शिक्षा सामग्री पनि पठाइनेछ । मतदान केन्द्रको ढाँचा, अपाङ्गता भएकाको मतदाताका लागि पहुँच पु¥याउने खालको सामग्री, कोभिड १९ को सावधानी पोस्टर, सही तरिकाले मतदान गरौँ भन्ने पोस्टर मतदाता शिक्षा सामग्रीको रुपमा पठाईने निर्वाचन कार्यालयले जनाएको छ ।

दुई लाख १८ हजार पाँच सय ६३ मतदाता रहेको गोरखामा दुई लाख ४१ हजार मतपत्र आएको छ । मतपत्रको क्रमसंख्या, मतपत्र रुजु गर्ने काम अहिले भईरहेको मूख्य निर्वाचन अधिकृत दिनबन्धु बरालले बताए । गोरखामा ४३ लिटरको चार सय ४३ र ५० लिटरको चार सय छ वटा गरी आठ सय ४९ मत पेटिका आईपुगेको छ ।