गोरखाबाट एमालेले छान्यो १५ जना महाधिवेशन प्रतिनिधी (नामसहित)

गोरखा । नेकपा एमाले गोरखाले १० औं महाधिवेशनका लागि प्रतिनिधी छनौट गरेको छ । आगामी मंसिर १० देखि १२ गतेसम्म चितवनमा हुने महाधिवेशनका लागि एमाले गोरखाले सर्वसम्मत प्रतिनिधी छनौट गरेको हो ।

दुई संघिय निर्वाचन क्षेत्र रहेको गोरखाबाट १५ जना महाधिवेशन प्रतिनिधी छनौट भएको एमाले गोरखाले जनाएको छ । जसमा क्षेत्र नम्बर एक बाट ८ जना, दुईबाट ६ जना र एक जना दलित तर्फबाट गरी १५ जना प्रतिनिधी छानिएको बताइएको छ ।

४ हजार ५ सय ९२ संगठित सदस्य रहेको गोरखा क्षेत्र नम्बर १ बाट खुल्ला तर्फबाट सुरेन्द्र बहादुर थापा, गोपाल पाण्डे, कृष्ण बहादुर नेपाली, सुरेशबाबु श्रेष्ठ, मोहन प्रसाद भट्टराई र विशाल थापा रहेको निर्वाचन अधिकृत रमेश अधिकारीले जानकारी दिए ।

त्यस्तै महिला तर्फबाट सम्झना देवकोटा र मिना बरामु प्रतिनिधी बनेका छन् । यसैगरी ३ हजार ५८ जना संगठित सदस्य रहेको क्षेत्र नम्बर २ को खुल्ला तर्फबाट प्रेम बहादुर गुरुङ, बाबुराम थापा, हरि प्रसाद काफ्ले र कमल दानी क्षेत्री महाधिवेशन प्रतिनिधी चयन भएका छन् भने सोही क्षेत्रबाट महिला तर्फ पार्वतीदेवी पाठक र रुपा पन्त सर्वसम्मत प्रतिनिधी छनौट भए ।

यसैगरी उत्पीडित तथा दलित तर्फबाट काजीराम रोका प्रतिनिधी बनेका छन् ।

सर्वसम्मत महाधिवेशन प्रतिनिधी चयन भएका १५ जनालाई शनिबार एक कार्यक्रमका बिच प्रमाणपत्र प्रदान गरिएको छ । उनिहरुलाई पार्टीका केन्द्रिय सदस्य रामशरण बस्नेतले प्रमाणपत्र वितरण गरेका थिए ।

साथै सोही अवसरमा एमालेले पत्रकार सम्मेलन गर्दै जिल्लाका चुमनुब्री गाउँपालिकाका ७ वटा वडा बाहेक अन्य १० स्थानीय तहका ८७ वडामा अधिवेशन सम्पन्न गरेको जानकारी दिएको छ । भौगोलिक विकटताका कारण चुमनुब्रीमा अधिवेशन हुन नसकेको र महाधिवेशन अघि सम्पन्न गर्ने लक्ष्य राखिएको एमाले गोरखाका इन्चार्ज समेत रहेका बस्नेतले बताए ।

• 

• 

साथै उनले लोकतन्त्रको पूर्ण अभ्यास गर्दै सबै तहमा सर्वसम्मत रुपमा अधिवेशन सकिएको समेत जानकारी दिए । एमाले गोरखाका जिल्ला अध्यक्ष प्रेम बहादुर गुरुङको अध्यक्षतामा भएको पत्रकार सम्मेलनमा बोल्दै गण्डकी प्रदेशका पूर्वमन्त्री समेत रहेका बस्नेतले एमाले नेतृत्वको सरकारले राम्रो काम गरेका कारण ढलेको दावी गरेका छन् ।

‘यहाँ राम्रो काम गर्नेको खुट्टा तान्ने प्रवृत्ती नयाँ होइन, हाम्रो नेतृत्वको सरकारमा समेत त्यहि भएको हो’ उनले थपे ‘अहिलेको नयाँ यो गठबन्धन स्वार्थमा केन्द्रित छ, धेरै टिक्दैन ।’

• 

• 

साथै उनले नेकपा एमाले विभाजनको असर गोरखामा १ प्रतिशत भन्दा बढी नपरेको समेत दावी गरेका छन् । आगामी १० गते चितवनमा हुने महाधिवेशनको उद्घाटन कार्यक्रममा गोरखाबाट ५ हजार कार्यकर्ता लैजाने गरी पार्टीले तयारी गरेको एमाले गोरखाका सचिव कृष्ण बहादुर नेपालीले जानकारी दिए ।