प्रचण्ड–नेपालको शक्ति प्रदर्शन आज, २ लाख कार्यकर्ता भेला हुने दाबी

सरकारविरुद्ध नेकपा प्रचण्ड–नेपाल पक्षले आज (बुधबार) काठमाडौंमा शक्ति प्रदर्शन गर्दैछ।

नेकपा केन्द्रीय सदस्य विष्णु रिजालका अनुसार विरोध सभा दिउँसो १२ बजेपछि सुरु हुने छ ।

भृकुटीमण्डपमा आयोजना गरिने विरोधसभामा २ लाखभन्दा बढी मानिस सहभागी हुने रिजालकाे दाबी छ।

यसकारण भाषण सुन्न सजिलो होस् भनेर पुरानो बसपार्क, राष्ट्रिय सभागृह र भद्रकालीमा डिजिटल स्क्रिन राखिएको उनले जानकारी दिए। साथै रत्नपार्क, बागबजार र त्रिपुरेश्वरमा माइक पनि व्यवस्था गरिने उनले बताए। 

प्रधानमन्त्री केपी शर्मा ओलीले गत पुस ५ गते प्रतिनिधि सभा विघटन गरेपछि प्रचण्ड–नेपाल पक्ष आन्दोलनरत छ। यसअघि उसले माघ ९ गते पनि काठमाडौंमै विरोध सभा गरेको थियो।